第一集

沈薇：雖然我從來都不懂你嘅沉默，

張小軒：雖然我唔相信自己嘅心，

沈薇：雖然我忽略咗愛一個人其實係有好多種方式，

張小軒：但係你又知唔知，

合：喺我遇到你嘅果一晚，我已經愛上咗你

（音樂：《無能為力》）

張小軒旁白：喺高中畢業嘅果個暑假，我約咗成班Friends一齊去參加電台喺某間酒吧搞嘅化妝舞會，果一晚我遇到咗Mei Mei……

工作人員：唔該，入場券呀！

張小軒：入場券……入場券，疑？我張入場券呢？明明記得出門嘅時候袋喺個褲袋度嘎！

工作人員：對唔住啊，無入場券係唔可以入去過喔……

張小軒：ER……死啦，Gary佢哋應該都無多張飛過喔，點算呢？唔通就咁返去啊？等我仲專登走去租咗套咁型嘅衫同面具返來添，咁咪篩曬？

旁白：就喺張小軒喺度為唔見咗張入場券而閉哎嘅時候，忽然之間有人遞咗張入場券喺佢面前。

沈薇：我借張飛給你呀。

張小軒旁白：白雪公主？

旁白：張小軒呆咗下，面前呢個女仔除咗著住一件西歐嘅公主服，D皮膚亦都好似雪咁白，精致嘅五官加上雪白嘅膚色，成個人真係好似童話故事裏面嘅白雪公主一樣，咁清麗脫俗！或者其他人會有唔同感覺嘅，但至少喺呢一刻，張小軒會覺得眼前呢個會係一個善良嘅白雪公主！

張小軒：啊？你借咗給我，咁你呢？

沈薇：我朋友臨時話有事唔來得喔，所以我有多張飛喺度。

張小軒：哦……咁唔該曬你啊！

沈薇：唔使！

張小軒：你唔入去？

沈薇：唔啦，一個人，好悶啫，所以我都打算返去了。

張小軒：你今晚打扮得咁靚，就咁返去啊？反正我帶咗面具，裏面又咁多人，我D朋友都好難認到我，不如我哋做個伴一齊入去玩呀。

沈薇：嗯……都好喔。咁我哋一齊入去呀。

工作人員：兩位請帶上我哋今晚為你哋準備嘅面具呀。

張小軒：唔使啦，我帶返自己呢個得了。

旁白：沈薇帶好面具之後，就同埋張小軒一齊步入酒吧。（酒吧裏的吵雜聲+音樂聲）

旁白：酒吧裏面一早已經逼滿曬著住各式各樣古怪服飾嘅人，沈薇同張小軒喺服務員嘅帶領之下終於揾到某個角落一張暫時無人用嘅台坐低。

沈薇：喂，你唔係一路帶住呢個面具來呢度呀嘛？

張小軒：係啊，所以沿途不知有幾多人用D傾慕嘅眼光望住我，幾威啊！

沈薇：啊？咁誇張！

張小軒：(^_^)，同你講笑喳！我驚行到半路，芳村D車已經開到來帶我返去啦。件衫就真係一早換好嘎嘞，費事一秋二楞咁麻煩啦，至於面具，當然係來到至帶啦，點啊，我咁樣打扮係咪好型呢？

沈薇：型到爆啦！

張小軒：你呢身白雪公主嘅造型都唔錯呀，想來揾白馬王子呢！

沈薇：揾鬼揾馬咩，個個都帶曬面具，完全唔知對方係乜嘢樣呀。喂，不如你除低個面具，給我睇下你個樣呀！

（過場音樂：《期待》）

張小軒：咁呀，好……難啦！

沈薇：點解啊？你岩先已經見到我個樣啦，你給我睇返你個樣都好應該啫！唔通，你生得好醜樣嘅？

張小軒：當然唔係啦，我對自己嘅長相不知幾有自信啊！只不過，凡事保持小小神秘感會好D嘅，如果唔係咪唔岩今晚化妝舞會個主題嘍！

沈薇：主題？乜嘢主題啊？

張小軒：啊？你唔知嘎？

沈薇：真係唔知啊。張飛都係我個同學聽電台拿嘅，點知佢又臨時放咗我飛機喔，所以我只係知道呢個係一個化妝舞會，要打扮得古古怪怪咁，其他嘅嘢我乜都唔知嘎！

張小軒：唔怪得啦！嗱，舞臺上面塊布景板度寫住嘅就係今晚嘅主題嘞！

沈薇：“在陌生中尋找熟悉，在神秘中尋找緣份”？幾特別喔！

主持：各位神秘嘅朋友，歡迎大家來到今晚嘅化妝舞會，等陣我哋電台嘅眾DJ亦都會以唔同嘅造型混入你哋當中，最先揾到佢哋嘅朋友就可以獲得佢哋今晚所準備嘅神秘禮物！而你哋自己所帶來嘅禮物，記得要喺保管好之餘，更重要嘅係揾到你想送給佢嘅對象喔！日後你哋要相認返，可能就要靠呢樣嘢嘎啦！宜家，請大家跟住D Music盡情咁同你認識嘅partner一齊跳下舞，又或者係互相傾下計，認識下啦！

沈薇：禮物？乜今晚要準備禮物來嘎？

張小軒：係啊，你無準備啊？

沈薇：無啊！唉，咁點算呢？

張小軒：嗯……有計！

旁白：張小軒從頸上除咗條頸鏈落來，原來呢條係一條圓形嘅情侶頸鏈，而圓形嘅鏈墜係可以將其中嘅一角拆出來變成另一條新嘅頸鏈。

沈薇：條鏈幾靚喔！不過，點解你會戴住條情侶頸鏈嘅？

張小軒：因為覺得佢特別嘍！而且呢條鏈會令我諗起一本曾經睇過嘅書，叫做《失落的一角》。本書圖案好簡單，而D字加加埋埋可能最多都係兩、三百字度，但對我嘅影響就好大，每次我遇到D唔開心嘅事，條鏈都會給好大嘅勇氣我去面對！嗱，我將呢一角送給你，我就留返呢個不完整嘅圓，如果我哋日後撞返嘍，咪可以憑呢條鏈相認嘍。

沈薇：條鏈對你咁重要，你留返啦！

張小軒：唔緊要啦，條鏈仲有一半喺我度呀嘛，我至在有樣嘢喺度提醒我嘅啫，少緊個角無問題嘎。

沈薇：但我無嘢送返給你喔。

張小軒：其實交換禮物都係想大家日後可以有樣嘢來認返對方啫，我原本都有準備另一份禮物來嘎，不過既然你都無帶到禮物，咁就唯有用呢條鏈來履行呢個任務啦。

沈薇：(^_^)咁好啦，多謝你條鏈先！我會暫時幫你好好咁保管住佢，如果日後我哋仲有緣相見嘅話，我再還返條鏈給你呀。

張小軒：好呀。疑？

沈薇：做乜啊？

張小軒：只歌我好鍾意嘎！古唔到會喺度聽到喔……

沈薇：既然係咁，不如我哋一齊出去跳舞呀。

張小軒：ER……(^_^)好呀。

旁白：張小軒伸出右手，沈薇望咗下，知道佢嘅意思，刹時間成塊面都紅曬，因為佢咁大個女都未同異性拖過手嘎，雖然只係跳舞，但足以令佢不足所措，心跳加速。

沈薇：好在呢度D燈光暗暗地啫，如果唔係，給呢個男仔見到我塊面咁紅，實瘀死啊！

旁白：沈薇慢慢將手放喺張小軒嘅手心度，然後兩個人就喺人群中跟住D音樂一齊擺動身體。由於人太多了，佢哋兩個要貼到好埋至鬱動到。唔知係咪D音樂嘅關系呢，縱使對方都戴住個面具，但依然感覺到對方喺面具下所流露出來動情嘅眼神，仲有彼此緊張嘅心跳聲……

（過場音樂：《觸摸心跳》OR《春天》，中途音量收細）

沈薇：係喔，我都未知你叫乜名添。

張小軒：我啊……你叫我地場衛呀！

沈薇：地場衛？雖然你今日打扮到成個禮服蒙面俠咁嘅樣，但都唔使叫埋佢個名嘎！

張小軒：名，只不過係一個人嘅代號啫，就算知道又點呀，如果我哋以後撞唔返，知道個名又有乜用啊！不如等個天來安排啦，如果咁都給我哋撞得返，到時我哋再講個名給對方知，咪仲好！

張小軒旁白：呢一晚，我發覺自己講嘢變得特別耐人尋味，給人嘅感覺亦都特別神秘，仲係一個神秘嘅情聖添！唔通係給Gary感染咗？不過咁都好呀，起碼可以同眼前嘅呢個靚女過一個咁美麗嘅夜晚，未嘗唔係一件好事！

（繼續之前嘅音樂）